Just One Click

 Just One Click

Bța Hnamte

Tunlai khawvel engkim mai a hmanhmawh tawhna hun ah hian, mihringte hian engkim mai hi rang taka neih leh hmuh thuai thuai kan duh vek tawh mai a nih hi. Engkim mai hi high speed in kan duh a, kan dawhtheihna pawh a tlem tial tial nite pawh in a lang. Kan eizawnna kawngah leh hna kan thawhna kawngah pawh engkim mai hi tih thuai thuai a, a rah hmuh nghal zung zung kan duh ta vek mai. Sap thufing in slow and steady wins the race a tih pawh kan hrechang meuh ta lo chu a ni deuh ber mai.

Kan thil duh zanwgte pawh neih thuai thuai mai kan duh a, chutiang bawkin rang taka hausakte kan duh bawk a, vawi leh khatah hausak thut te, car, bike, in leh lo etc., te pawh han click zeuha neih mai theih ahkan ngai ta nite pawh in a hriat theih. Hei hian pawisak neihlohna ah min hruai lut a, kan sum lak luhna lam kan ngaihtuah ta lo, sum leh pai neihna tur a nih chuan tih hreh kan nei ta reng renglo mai nite pawh in a hriat theih awm e. 

Sum leh paia kan rual elna hian mawi leh mawilo pawh min thliar tir theilo a, hei hian rinawmna min hloh tir a, sawrkar phalloh thil leh eiruk thlengin mihringte min hnuk lut ta niin a lang. Hlawhtling tur chuan rim taka thawh a ngai a ni. Mahni kut kawih ngei a dingchhuak a, hlawhtling tur chuan teirei peih a ngai a, dik taka sum la luta hausa tur pawhin hun a duh rei thin a ni. Just One Click ah hian dik taka hausakna a awmlo a, mahse hausak thut duhna hian mihringte min ti a zo a, chu chuan kawngdik min zawh tir theilo thin a ni.

Kan ngaihhlut zawng leh duh zawng te hi chhungkua ah kan in zirtir uluk a ngai hle mai. Nu leh pa ten kan fate hausa tura kan zirtir ngar ngar chuan hausak tumna hian kawng diklo ah a hruailut thei tih te pawh kan hriat a tha awm e. Hausakna hi sum leh pai neih tam lam nilo in kan thinlung leh rilru hausakna hi a pawimawh. Mi tanpui turin hausak aiin rilru leh thinlung a pawimawh tih kan hriat pawh a tha awm e. Kan mihring pui te tana malsawmna nih hi kan tih theih zinga pawimawh tak a ni a, midang tanpuitu ni tura kan in zirtir thar leh te pawh a ngai hle mai.

Heng kan sawi tak kut tlinglo a sum leh pai lakluhna hian kan ram a tichhia in, kan nun pawh a ei chhe nasa hle a ni. Chuvang in kan ram siamtha tur hian nang leh kei hi kan pawimawh ber a, rinawmna leh taimakna hian huaisenna min pe a, dik taka ti a, fel taka kan nun phawt chuan kan ram hi kan siamtha thei a ni tih i hre thar le hang u.

 Masi

Bta Hnamte 

Kan naupan lai khan masi hi kan nghakhlel thei khawp thin a, kawngsir a tlangsam kuhmum kan hmuh te hian masi a hnai tawh tiin kan hlim thei thin hle mai. Kalender kan han en a, masi thlen nan ni la awm zat te kan chhiar tlauh tlauh thin a ni. 

Zanah nula leh tlangval masi tui chawi zuiin kan kal tel thin a, meichher kengtu ah kan tang a, kan zui ve hnak hnak thin kha a nia. Pa ho in masi bawng an kai a, naupang ho in kan lo hmuak a, masi bawng huai nei veng nih te kha kan inti thei ve hle thin a ni. Masi bawng kan thlah(chaw ei tur awmna hmunah kan hruai thin) thin a, zana thing muh tur kan han hnuh haw tir pah bawk thin kha a nia.  Tlangval ngeiawm deuhin kan thingmuh kha an han zun khum ngei bawk a😅 December ni 24 zan kha chuan Masi thlen in ah puanhlap nen tlaivar tum khan kan lum lut ve tawp zel kha a nia

Rawlthar kan han ni chho a, masi thingpurh, tui chawi leh thing eh na ah te rual u zawkte hnung zuiin kan han tel chho ve a, a lo nuam thi hle mai. Zanah KTP in masi carol te neiin a naupang pawl nih kha chuan Petromax kengtu ah te khan min hmang thin a. Carol tawpna ah khan sawhchiar te lo siam in tui ti tak khan kan han pir a, masi kha a ni hliah hliah thin. Krismas ruai theh ni a lo thleng a, fatu ah min han ruat a, thiante ruai theh zo leng tur kha zui kan chak thin ngei mai. Ruai eina seng hawi zawh veleh khan kan han leng kual a, kan khawvel kha a lo nuam thin ngei mai.  Tunlai hian khatiang ang huna kan masi hman ang khan nuam hi ka ti ta meuhlo a ni😅

Kum te a lo vei chho zel a, hmun dangah lehkha zir ten kan han awm a, thian za ho pali in in lian lo tak kan inluah tawm a, chu inchhung zim te ah chuan kan hlim in nuam kan ti tlang thin ngei mai. Unau ang mai khan kan awm khawm kha a nia.  Nuihna tur lah kha kan ngah em em mai bawk a. A luck deuh khan love letter te kha an han dawng a, lehkha dawngtu khan in bualfai ver vawr hnu ah ding chungin an chhiara, kan lo ngaithla thap a, love letter a duhthusam lo lai te kan sawi khawm zui nghal thin kha a nia😅

Thlaruk zet kan awm hnu in masi a lo hnai a, haw turin kan rilru an in buatsaih tan a, haw kan chakin kan a phur ngei mai. Haw hun tur leh in thlen hun a kan hun hman dan turte kan sawi ho kha a nawm hunlai tak a lo ni. Zan mut dawnah a hma kuma kan masi hman dan te kan han report liam liam a zan te kha tum tawi thin ngei mai. 

Kan vanglai leh thatlai huna masi kan hman dan hian kan nunah nasa takin thu hi a lo sawi ve a. Kohhran huang chhunga masi hman kha a lo nuam in a lo him ner kha a lo ni. Khawvel taka hmang te kha kan ngai biklo reng reng a, masi effect pawh a awmlo nge nge a lo ni😅

Kumin zet zawng COVID-19 vangin kohhran ah masi hman theih a ni dawn lo a, chhungkuaa hlim takin Lal Isua piancham hi i hmang theuh ang u. Isu vawiin ah hian kan thinlung bawngin ah lo piang nawn leh la nang kan chatuan Lal turin tih theuh i tum ila. Boney M hla a...be acceptable in Thy sight tih ang khan masi a kan chetvelna te hi Pathian mit hmuha pawm tlak a nih ngei theih nan kam hun te uluk takin i hmang u. 

Krismas chibai vek ule